انهي شريعة ؟!

حازم ده بقى اغرب شخصيه في تاريخ البلاد .. دلوقتي بيبني الحمامات والمسجد و بالمنظر ده داخل على اعتصام مفتوح والحقيقة انا مش عارف هو مطالبه ايه في الاعتصام اللطيف ده .. تطهير الاعلام ؟! اللي هو ازاي يعني ؟ 

نظرة سريعه كده على الاعلام ده وعلى قايمتهم السودا .. هتلاقي القائمة فيها اي حد مختلف معاهم في الرأي .. وبالمناسبة هما معتصمين وبيهددوا بالتصعيد بدافع الدين والشريعه .. الشريعه اللي بقت متبعزأة اوي معانا ..

 الشريعه اللي بقت بأسمها بيتعمل كل حاجة تخالفها .. الشريعه اللي بقى اللي يدافع عنها بيبدأ باسم الله وينتهي بسبحانك اللهم وبحمدك وفي النص يسب ويلعن ويقول اوسخ الفاظ وكله باسم الشريعه .. ابووووس ايد اللي خلفوكوا وتقولولي دي شريعة مين اللي يتعمل بأسمها كده ؟! 

حازم .. عزيزي هو ايه رأي الشريعة من قناة التيت ؟ بلاش التيت .. ايه رأي الشريعة في افلام السبكي ؟ طيب كابريهات شارع الهرم ؟ بلاش كل ده .. ما رأي الشريعة يا شيخنا في المخدرات اللي ماليه البلد ؟ .. ولكن لا .. كل ده كان عادي .. وهيفضل عادي انما تخالفني في الرأي ده بقى اللي مش عادي .. اسد يا شيخنا أسد ... عموما العلمانيين غيرانين منك و منزلين علبة ذهبية هتحول الشعب كله اسود .. يلاا بكرا الاعتصام يتفض على مفيش يا عزيزي ماهي مش جديدة عليك ... 

عموما يا اسيادنا انا مش مع الاعلام ولا اللي بيحصل فيه من الطرفين بس انا مع حريته .. اللي عايز يقول حاجة يقولها .. وزي ما قال ريسنا "الحق أبلج والباطل لجلج" بس الحق لما يبقى بحق مش هيحتاج اعتصامات .. 

الاسلام انتشر بالمعاملات يا سادة .. لما سيدنا عمرو ابن العاص جه مصر وكان الفتح .. اهل مصر مأسلموش كده بضغطة زرار .. اسلموا لما شافوا المسلمين ومعاملتهم ولكم في التاريخ عبر .. 

فوقوا وصححوا النية وصححوا اسلامكم .. منهاج الدعوة عند معظمكم يحتاج لتصحيح .. يحتاج لثورة تصحيح .. شاشات الدعوة ونوافذها اصبحت مصدر تنفير وساحات للبلطجة .. وتحولت ادوات دعوتها لصفات اتى نبينا عليه الصلاة والسلام لتصحيحها .. استقيموا يرحمكم الله ..